Presentade la prime edizion de Cope Friûl: 13 scuadris pâr un sium fondât su la identitât furlane.

UDIN – No l’è dome balon, e je identitât. Îr di sere, inte curnîs de sede di Credifriuli, il cûr dal Friûl dal balon al à scomençât a bati plui fuart. E je stade presentade la prime storiche edizion de Cope Friûl, il torneu che al celebre il balon dai paîs, dai cjampanii e de passion pure, dedicât aes scuadris di Tierce Categorie.

In presince dal president de FIGC LND F-VJ Ermes Canciani, dal diretôr di Credifriuli Gilberto Noacco, dal conseîr regjonâl F-VJ Moreno Lirutti e dai vertiçs de Associazion Sportive Furlane, un public numerôs di dirigjents e zujadôrs al à assistût ae cubiade che e darà la vie al agonisim sul retangul vert.

Balon arût e braùre furlane

Dismenteâit il balon “fighetin” de television. Chi si fevele di majutis sudadis, cjamps di paîs e “tierç timp” garantît. La Cope Friûl e nas par dâ vôs a chês realtâts che a tegnin vîfs i nestris paîs: 13 scuadris prontis a dâsi “bataie” intun tabelon che al profume di tradizion.

Des sfidis dal turni preliminâr ai cuarts di finâl za delineâts, il percors al è segnât:

• Manià, Santemarie e Colorêt di M.A. a spietin al varc chês che a vinciaran dai prins scuintris.
• Si zuie il vinars di sere aes 20:00, sot dai rifletôrs dai paîs, cul tifo des grandis ocasions e simpri cun jentrade gratuite.

Il calendari: di primis sivilade fin ae finâl

Lis datis a son segnadis za sul calendari di ogni apassionât:

• 15, 22 e ai 29 di Mai: lis bataiis dal vinars di sere par decidi cui che al merete la glorie.
• ai 2 di Jugn (des 18:00): la finalissime a Maian. Un fieste di sport pâr dut il Friûl.

Sfide europeane: Friûl cuintri Sudtirol

Ma nol finìs chi. La scuadre che e alçarà la cope al cîl di Maian no sarà dome la “regjine dal Friûl”. Ai prins di Setembar, la vincidore e varà l’onôr di sfidâ in cjase i campions de Forst Cup dal Sudtirol pe Supercope. Un confront tra identitâts fuartis, unidis de lenghe dal balon e dal leam cu la proprie tiere.

“Chest torneu al e je la dimostrazion che la nestre lenghe e il nestri balon a son vîfs e a meretin spazi” si è dit dilunc de serade. Il Trofeu Credifriuli nol è dome une cope: al è il Friûl che al va jù in cjamp, braurôs des sôs lidrîs e de sô voie di stâ insiemi.

Buine fortune a dutis lis scuadris, che a vinci la miôr e vive il Friûl che al fevele furlan!